Po napinacym pućowanju krasny wuhlad ze Sněžki

My Radworscy ministranća přebywachmy zhromadnje z našim knjezom fararjom Benom Jakubašom wot póndźele do štwórtka 14. do 17. oktobra, na zhromadnym wulěće w pólskim Karpaczu. Přenocowali smy tam w młodowni. Dohromady běchmy 22 hólcow a holcow a k tomu hišće dwaj dorosćenaj, knjeni Sylwija Zimmermannowa a knjez Ingo Adam.

Hnydom prěnim dnju popołdnju pućowachmy po lěsu  blisko Karpacza. Krajina je tak rjana, zo docyła njepytnjechmy, kak daloko smy nóžkowali. Tak bě hižo ćma, jako spěwajo zaso wróćo ćehnjechmy.  Wječor zabawjachmy so z placanjom kartow a druhimi hrami. Dźeń skónćichmy ze zhromadnym modlenjom róžowca  a z wječernym paćerjom.

Nazajtra rano zhromadźichmy so k rańšemu paćerjej. Po snědani podachmy so na puć na Sněžku. Wona je z 1603 metrami najwyša hora Kyrkonošow na hranicy mjez Pólskej a Ćěskej. Puć na horu jara nahły a kamjenaty. To běše drje napinace, ale zdobom rjenje a zajimawe. Při-połdnju bližachmy so našemu cilej. Na wjeršku duješe chětro sylny wětřik. Na zbožo njebě pomróčene. Tuž widźachmy krasnu krajinu a město Karpacz na pólskej stronje a Králo-véhradecký kraj na čěskej stronje. Potom wobhladachmy sebi kapałku swjateho Ławrjenca , kotraž na wjeršku Sněžki na čěskej stronje steji. Kapałka bu hižo někak w lěće 1681 twarjena. Na dompuću podachmy so přez hrjebinu zaso wróćo do Karpacza. Při tym mějachmy krasny wuhlad na krajinu. Tón dźeń smy něhdźe 25 kilometrow pućowali.

Srjedu dopołdnja přebywachmy w tak mjenowanej Western City w blikosći  Karpacza, w mje-tanju pódkowy a hlebije, ale tež jěchanje na konju a we łaženje po zdónku.  To běše zajimawe dožiwjenje mějachmy tójšto wjesela při wuspytanju njewšědnych disciplinow. Připołdnju zhromadnje w ,,Saloonje´´ wobjedowachmy. Z busom podachmy so popołdnju do kupjele Termy Cieplickie w Jelenjej Górje. Tam móžachmy so wonka kaž tež nutřka kupać. A wjacore suwadła poskićichu nam přidatne wjeselo.

Štwórtk podachmy so na dompuć. Z ćahom wróćichmy so do Budyšina, hdźež nas starši na dwórnišću hižo wočakowachu. Zapłać Bóh tón Knjez našemu knjezej fararej Benej Jakubašej kaž tež wšitkim druhim, kotřiž su nam rjany lětuši ministranski wulět zmóžnili.

W mjenje Radworskich ministrantow, Leoni Wenclec, 26.10.2019