Wosada swjateje Marije Kralowny róžowca je katolska wosada w Radworju pola Budyšina. Wjes Radwor ma tři katolske cyrkwje: staru wosadnu cyrkej, křižnu cyrkej a nowu wosadnu cyrkej. Wosadźe přisłušeja serbsko- a němskorěčni wěriwi.

Stawizny Radworskeje wosady sahaja hač do 13. lětstotka wróćo. Wona słuša z tym k najstaršim wosadam Hornjeje Łužicy. W lěće 1221 załoži so Budyski tachantski kapitl. Radworscy křesćenjo wopytachu drje spočatnje Bože słužby w Budyšinje, dokelž so prěnja kapałka w Radworju hakle wokoło 1270 naspomni. Tuta wosada a 17 dalšich přisłušachu Budyskemu tachantstwu a dyrbjachu tak Mišnjanskemu biskopej lětnje wotedawki płaćić.

Najstarši spisowny dokument w Radworskim cyrkwinskim archiwje pochadźa z lěta 1397. W nim so na twar Křižneje cyrkwje a na wotkazanje sudniskeho prawa skedźbnja. Budyski radźićel Sigmund Behr, kiž mjenowaše so patron a kolator Radworskeje cyrkwje, da w lěće 1397 křižnu cyrkej natwarić. Wot njeho dósta Radworski farar na wšě časy wěste prawa a patronat wo Křižnej cyrkwi kaž tež namrěwstwowe prawa nad wjesku Kamjenej.

Dźensa přisłuša wosadźe něhdźe 1.600 katolikow w 60 wsach a wjesnych dźělach. Nimo wutory swjeći měšnik w Radworju wšědnje kemše w serbskej rěči, na njedźelach stajnje w serbskej a němskej rěči. Filialnu cyrkej ma wosada wot 2005 w Zdźěri. Tydźensce stej tež tu Božej mši w serbskej rěči. Na njedźelach stajnje tydźensce wotměnjejo serbsce a němsce.