Z wutrobu za cyrkej a wosadu

Něhdyši Radworski zwóńk Jurij Šibšik 80lětny zemrěł

Z wozjewjenjow njedźelu, 3. februara, zhonich, zo je naš dołholětny zwóńk Jurij Šibšik z Radworja w starobje 80 lět dźeń do toho, na swjedźenju Předstajenja Knjeza, na prawdu Božu wotešoł. Znajach jeho jako jara wjesołeho, přećelneho a jara pomocliweho čłowjeka. Po znatym Kosmasu Pjekarju, kotryž bě 50 lět zwóńk w Radworju, je wón hižo jako 16lětny młodostny lěta 1954 čestnohamtsku zwóńkowsku słužbu přewzał.

Jurij Šibšik nawukny we Wulkodubrawskej šamotowni powołanje formowarja a dźěłaše pozdźišo wot 1966 jako lijer w Budyskej wagonowni. Při přetwarje něhdyšeje Radworskeje fary na pěstowarnju spočatk 1980tych lět je hižo mócnje pomhał. Rano, prjedy hač so na dźěło poda, zatepi přeco pěstowarnju a druhdy hišće cyrkej a faru, kotraž bu w něhdyšej pěstowarni zaměstnjena. Dokelž so w Radworskej wosadźe wjele twarješe a wjele nowych nadawkow k tomu přińdźe, trjebaše naš tehdyši farar Clemens Hrjehor swěrneho a spušćomneho sobudźěłaćerja we wosadźe. Tak jeho 1986 jako zwóńka, domownika a zamołwiteho za kěrchow, tež wěste lěta jako tótku přistaji. Hačrunjež njebě zasłužba tak wysoka kaž we wagonowni, Jurij Šibšik tele dźěło a wšě nadawki přewza. Wšako měješe wulku wutrobu za cyrkej a wosadu. Wón sam je přeco prajił, zo je „tu w cyrkwi a wšo dokoławokoło moje doma a spožča mi žiwjensku móc“.

Jurij Šibšik měješe wulku zamołwitosć při twarjenju pěstowarnje, noweje fary, wosadnicy „Swětlik“, při ponowjenju Stareje cyrkwički a murje wokoło njeje kaž tež teje wokoło kěrchowa a při ponowjenju domu za wuměnk. Njebohi bě wjele lět sobustaw Radworskeje wosadneje rady a je sobu wudźělał swjate woprawjenje na njedźelnych Božich mšach. Swěru je pjeć wosadnym fararjam słužił. Běchu to fararjo Józef Nowak, Jurij Hermann, Beno Šołta, Clemens Hrjehor a Šćěpan Delan.

Bože narodki běchu jemu wosebje wažne. Tuž husto ludźom nowe natwari. Jeho hobby bě jeho zahrodka, a hdyž to jemu čas dowoli, chodźeše rady do hribow. Zwonka cyrkwinskich słužbow běše aktiwny sobustaw Radworskeje wohnjoweje wobory. Je za čas wobstaća dźiwadłoweje skupiny sobu na jewišću stał. Jeho talent smědźachmy potom hišće husćišo na wosadnych swjedźenjach wobdźiwać.

Jako w starobje 65 lět słužbu woteda, wón přiwšěm husto nowemu zwóńkej Benej Wróblej wupomha. Njech Bóh bohaće Jurja Šibšikowu prócu mytuje po słowach krala Hiskije: „Ach, Jahwe, mysli na to, kak sym ja swěrnje a z njedźělenej wutrobu za tebje žiwy był, kak sym činił, štož je spodobne w twojimaj wočomaj!“ (2 Kral 20,3)

Bosćij Ješka
Katolski Posoł, 10. februara 2019